Roshni se kah do..

Roshni se kah do...

A Nazm by Faridoon Shahryar

Murawwaton ki majlis mein 

Khamoshi ko tasleem kiye 

Ek kone mein baitha hoon main

Qaid hoon 

Apne faisle ki hikmat mein

Azaad hoon 

Ye fitrat hai meri 

Roshni se kah do 

Andhere manzoor hain mujhe

Toofan se kaho....

Toofan se kaho...

A Nazm by Faridoon Shahryar

Mushkilon ki baarish

Thame na kabhi

Ruke na kahin 

Garajti larazti bochaar

Main khada hoon jahan

Vahan barasti rahe 

Ghamon ki phuaar 

Aazmaish meri manzil 

Justuju jumbish 

Maqsad mera

Toofan se kaho

Mehnat karo

Junoon hi hai sheva mera

Lazzat e Aarzu

Lazzat e aarzu ko kiya hai Khuda Hafiz 

Ab koi kahe to phir kaho hum kahen kya

Khwabon se kaho...

Ye raat khamosh sahi, udaas to nahin 

Khwabon se kaho, muskura bhi do ab

#FaridoonShahryar

Dhund duniya se ruu shanaas

Dhund duniya se ruu shanaas

Nazm by Faridoon Shahryar

Sirhaane kuch khwabon ne 

Besakhta apne hone ka 

Ahsaas mujhe dilaya hai 

Haqeeqat ne dheeme se 

Apne qadmon ki aahat se

Mujh ko jagaya hai 

Khuli aankhon ne

Dhund Duniya se 

Ruu-shanaas 

Kaise hote hain 

Muqaddar apna banaya hai

Main aur meri manzil 

Aur ye ghana kohra.

Sailaab

Main is raat dariya ke paar utar bhi jaoon to kya hoga 

Ye sailaab mere aasuon ka hai jo abhi tak bahe bhi nahin

#FaridoonShahryar

Seher ab door nahin

Seher ab door nahin 

A Nazm by Faridoon Shahryar

Maine raat ke kaanon mein

Kuch kahne ki koshish

Inhimaak se ki hai shayad

Aankhon ke samandar se

Seepiyan batoro,

Ret ke jazeere ko

Salaam karo,

Khwabon se kaho

Seher ab door nahin